leita

Erró ólst upp á Klaustri

Erró ólst upp á Kirkjubæjarklaustri. Þar lék hann sér í læknum, klifraði í fossinum, hljóp um túnin, veiddi silung í net, fór á hestbak, skellti sér stundum til sunds í Skaftá, gróðursetti agnarlítil tré í skóginum á Klaustri og tók þátt í öllum daglegum störfum á íslensku sveitaheimili. En tvennt  var  óvenjulegt. Erró fékk að fylgjast með Kjarval mála í barnaskólanum sem stóð fyrir utan húsið á Kirkjubæ I. Enginn annar krakki á Klaustri fékk að koma inn á vinnustofu Kjarvals. Þegar Kjarval fór skildi hann eftir striga, pensla og málningu sem strákurinn fékk að nota. Annað var að Erró fékk vinnuaðstöðu til að mála í einum bragganum á Klaustri. Segir Erró að stjúpfaðir hans hafi áttað sig á að hann þyrfti næði og rými til að mála og lét honum eftir hluta af bragga sem stóð niður við Skaftá.

Erró, Guðmundur Guðmundsson, fæddist í Ólafsvík 19. júlí 1932. Hafa Ólafsvíkingar verið duglegir að segja frá veru drengsins í Ólafsvík og hafa haldið listasýningar honum til heiðurs. En Erró var ekki lengi á Snæfellsnesinu því þegar Erró var á öðru ári flutti móðir hans, Soffía Kristinsdóttir, með hann að Fossi á Síðu þar sem hún gerðist ráðskona. Kirkjubæjarklaustur er ekki langt frá Fossi og þar fann Soffía eiginmanninn, Siggeir Lárusson, einn Klausturbræðranna. Þau byggðu sér hús við hlið burstabæjarins á Kirkjubæjarklaustri  sem heitir Kirkjubær I og þar ólst Erró upp hjá móður sinni, stjúpföður og þremur systkinum.

Erró var á Klaustri til 14 ára aldurs að hann fór til náms í Reykjavík en kom heim í fríum. Erró er sonur Guðmundar Einarssonar, myndlistarmanns frá Miðdal. Þeir höfðu lítil samskipti á meðan Erró var á Klaustri en kynntust eftir að Erró flutti til Reykjavíkur og hvatti faðirinn hann til að fara utan til listnáms. Erró var skírður Guðmundur en var oftast kallaður Gundur þegar hann var krakki á Klaustri. Hann tók sér fyrst listamannsnafnið Ferró en varð að breyta því þegar kom í ljós að annar listamaður notaði það nafn. Þá varð til nafnið Erró og frá 1963 hefur það verið listamannsnafn stráksins sem byrjaði ferilinn á bökkum Skaftár.

Listferill Errós sem hófst á Klaustri hefur varað óslitið síðan og árið 2017 er hann enn að mála myndir á vinnustofunni sinni í París og setja upp sýningar á verkum sínum víða um heim. Erró gaf Listasafni Reykjavíkur mikið af verkum, skyssum og efni sem tengist lífi hans og starfi. Errósafnið er í Hafnarhúsinu við Tryggvaggötu og er alltaf uppi sýning á verkum hans. Best er að skoða á vef Listasafns Reykjavíkur þar sem eru myndir af verkum listamannsins og umfjöllun um verk hans http://listasafnreykjavikur.is/listamadur/erro

Aðalsteinn Ingólfsson. 1991. ERRÓ. Margfalt líf. Mál og menning, Rv.

Danielle Kvaran. 2007. Erró í tímaröð – líf hans og list. Mál og menning og Listasafn Reykjavíkur, Reykjavík.

Share it on your social network:

Or you can just copy and share this url
Related Posts